أشعل محمد عبد الوهاب، شقيق الفنانة شيرين عبد الوهاب، موجة واسعة من الجدل عبر مواقع التواصل الاجتماعي، عقب هجومه اللاذع على الإعلامية بسمة وهبة، حيث اتهمها باستضافة طليق شقيقته بهدف التشهير بها، وذلك بالتزامن مع تصاعد الحديث حول الحالة الصحية والنفسية للمطربة المصرية.

هجوم مباشر من شقيق شيرين على بسمة وهبة

نشر شقيق شيرين عبد الوهاب، عبر صفحته الشخصية «فيسبوك»: «الأستاذة بسمة وهبه.. يا ريت حضرتك ما تعمليش بتحبيها أوي كده، دا انتي جيبتي طليقها مخصوص في رمضان عشان تقطعوا فيها، ولما البرنامج اتوقف، كنتي بتطلعي لايف من “إنستجرام” وتتصلي بيا، وبردو تقطَّعي فيها».

وتابع شقيق شيرين عبد الوهاب: «مش عيب على إعلامية كبيرة ومخضرمة زي حضرتك، لما واحد زي ده يقولك: أنا علِّيت سعر شيرين بره مصر، وأنتي تعديها عادي؟.. وهو أبعد حفلة عملها في بورتو المنيا».

حسام مركبش الطيارة غير مع شيرين

وتابع منشوره: «يعني شيرين اللي وقفت على أكبر مسارح الوطن العربي، قرطاج، وجرش، وهلا فبراير، وليالي دبي، وسوق واقف، وأوبرا عمان، ولفِّت معظم أوروبا وأمريكا قبل ما تشوف وشه أصلا، كان من باب المهنية تسأليه سؤال واحد: جبت الخِبرَة دي منين عشان واحد زيك يعلِّي سعر أكبر مطربة في الوطن العربي؟.. يا أستاذة ده مركبش طيارة غير مع شيرين.. عيب والله».

شقيق شيرين يكشف التفاصيل الخاصة بالفنانة

نشر شقيق شيرين عبد الوهاب تعليقا جديدا عبر صفحتها على موقع التواصل الاجتماعي فيسبوك يوضح فيه بعض التفاصيل الخاصة بالفنانة.

وكتب محمد شقيق شيرين عبد الوهاب: «أقسم بالله العظيم 90% من الأخبار مغلوطة وغير صحيحة تماما، والناس اللي بتّاجر بيها في البرامج والمداخلات، محدش ساعد غير اتنين، أحمد سعد وزينة بس، ومحمود الليثي كان كل يوم عندها».

واستكمل: «إحنا بقى بعيد ليه؟، عشان اللي انتوا شايفينه ده، حياتها عبارة عن حرب، إحنا لما تدخلنا في سنة 2022 من 4 سنين، اتقال علينا إيه؟، إننا نهبناها، ومستفيدين، وناس وحشين، طيب ماشي، نجحوا إنهم يبوظوا علاجها، وبعد 4 سنين ناس تانية غيرنا، أهُم فنانين ومعروفين، ومالهمش مصلحة اللي بيدور معاهم، جابوا كل تاريخهم القديم، ودول كذا وكذا، وازاي دول اللي يعالجوها، مين بقي اللي ليه مصلحة يطلع يشوه الناس دي، زي ما شوهنا من قبلهم، واللي طالع يقول مش صح إنها تروح بيت صاحبها، كله بيتاجر، عرفت منين حضرتك إنها راحت عندها ومتأكد أوي».

وتابع: «الفنانة زينة عدت عليها يوم قالتلها أنا حاسة إني تعبانة، قالت لها المستشفى أهي قريبة، يلا بينا، راحت واطمنت عليها، وهما هناك الدكاترة طلبوا منظار، خدت بينج وماكنتش قادرة تركب العربية، خدوها بسيارة إسعاف لحد بيتها، دي كل الحكاية.. ليه بقي تحديدا الاتنين دول واقفين جمبها بجد؟.. عشان دول عشرة العمر، نعرف بعض من قبل ما حد فيهم يبقى معروف، من زمان عشرة وستر وغطا، وحاجات كتير أوي، أي حد تاني بقى كله بيتاجر بيها، الناس دي بقى دلوقتي هتزعل مني جدا، عشان ما كانوش عايزين حد يعرف أي حاجة، عشان ما يتفهموش غلط».

بسمة وهبة شيرين بحاجة إلى دعم من أسرتها

وكانت الإعلامية بسمة وهبه قد أبدت تأثرًا وانفعالًا على الهواء أثناء تقديمها برنامج «90 دقيقة» عبر قناة المحور، إذ تحدثت عن الظروف الصعبة التي تمر بها الفنانة شيرين عبد الوهاب.

وأكدت «وهبة»، أن شيرين في هذه المرحلة لا تحتاج إلى الأصدقاء بقدر احتياجها إلى دعم حقيقي من أحد أفراد أسرتها يكون حريصًا عليها، مشيرة إلى أن ابتعاد ابنتيها عنها وإقامتهما مع والدهما أسهم في شعورها بالوحدة وعدم الاستقرار على المستويين النفسي والصحي.

وخلال الحلقة، تساءلت بسمة وهبة قائلة: «مين يحميها؟»، معبرة عن مخاوفها من احتمالية تعرض شيرين للاستغلال أو النصب في ظل غياب السند العائلي.

كما وجهت بسمة وهبة رسالة مباشرة للجمهور دعت فيها إلى عدم تداول صور شيرين في حالتها الصحية الحالية أو التركيز على تغير مظهرها وزيادة وزنها، مؤكدة أهمية مراعاة البعد الإنساني قبل أي اعتبار آخر، ومشددة على محبتها الكبيرة لشيرين وقلقها الصادق عليها.

اقرأ أيضاً
بعد أزمتها.. تامر حسني يدعم شيرين عبد الوهاب بهذه الكلمات

«بحبك ارجعي لجمهورك».. فيفي عبده توجه رسالة مؤثرة لـ شيرين عبد الوهاب وزميلاتها يتفاعلن