هاجم الإعلامي عمرو أديب تصريحات حسام حسن عن المغرب وتنظيمهم السيء لـ كأس أمم إفريقيا، مشيرا إلى أن المغرب وقفت بجانبنا بطريقة أدهشته، فكيف يتحدث عنها بهذه الطريقة، ولماذا تحدث بذلك في وقت خسارة المنتخب، موضحة "انت الوحيد اللي خارج بخناقة".

عمرو أديب يهاجم تصريحات حسام حسن 

وقال عمرو أديب في برنامج الحكاية المذاع على قناة mbc مصر في تصريحات رصدها موقع تحيا مصر: "لو بتعمل بطولة الأمم الأفريقية في مصر، وكل يوم الناس بتروح استادات مختلفة والقطارات بتاعتك عظيمة وكل حاجة حلوة وجميلة وكل واحد يقعد في مؤتمر صحفي ازاي مصر عاملة تنظيم جيد ودافعة فلوس.

وتابع حديثه قاصدا حسام حسن: فاجأة يجي مدرب يقول التنظيم زي الزفت والبلد كلها ناموس، انت كمصري هتقول اي؟، انتوا ليه مش مقدرين حكم الغضب في الإعلام المغربي؟ خدتوا جزء من حديث الصحفي المغربي لكن مجابوش باقي الحديث، المغرب مش إمكانياتها فقيرة احنا اللي إمكانياتنا كانت فقيرة في المباراة والفرقة مش من حقها تنقد بطولة كاملة، وانت الوحيد اللي طلعت اتكلمت في السياسية مش في الرياضة.

عمرو أديب لـ حسام حسن: انت كنت أكتر من سيء 

وأضاف عمرو أديب في حديثه عن حسام حسن: المغرب بيبعتلك جمهور يقف جنبك وانت احتمال تاخد مني البطولة فأنت ازاي تقول كدة؟، انت لسة فاكر أن الفندق فيه ناموس بعد ما خسرت البطولة؟، انت كنت سيء واكتر من سيء، شكلنا بعد الماتش كان غريب والحكم مكنش مشكلة انت عملت اي اصلا، حسام حسن بيتكلم ليه في السياسة بدل ما تقول أنا آسف مكناش موفقين انت الوحيد اللي خارج بخناقة.

وأردف: "انت بوظت علاقتنا مع الناس هناك وكانوا بيتمنولك الرضا ترضى، كل الحاجات اللي قولتها شماعات، احنا مصنع شماعات".

عمرو أديب: اتمنى المغرب تاخد الكاس 

واختتم عمرو اديب حديثه: "أتمنى المغرب تاخد كأس أمم إفريقيا على اهتمامهم بينا ووقوفهم جنبنا، وتشجعيهم لينا، والجمهور اللي كان بيبعتهولنا"، وهي رسالة دعم وأسف له عما حدث من حسام حسن وابراهيم حسن بعد خسارة المنتخب المصري.