محمد سيد بشير: مسلسل فرصة تانية باظ في نصه.. وهروب اضطراري اتنفذ بعد 12 سنة - تواصل نيوز

تواصل نيوز - كشف المؤلف محمد سيد بشير العديد من المفاجآت عن كواليس مسلسل فرصة تانية التي لعبت بطولته الفنانة ياسمين صبري، مشيرًا إلى أنه يُعتبر أنجح مسلسل في مشواره الفني رغم اضطراره لتعديل الكثير والكثير بسبب جائحة كورونا، فضلا عن كواليس تحضيره لـ مسلسل هروب اضطراري.

محمد سيد بشير: مسلسل فرصة تانية اتحارب وباظ في نصه بسبب كورونا 

وقال محمد سيد بشير خلال لقائه مع الفنانة هبة عبد الغني في بودكاست "بوب كورنر" في تصريحات رصده موقع تحيا مصر: مسلسل فرصة تانية كان المفروض يتعمل بعد مسلسل "أيوب" على طول، ولكن وقتها طلبوا مني أعمل شعبي تاني فعملنا "أبو جبل"، ولما جيه وقت "فرصة تانية" هو أكتر مسلسل نجح لي في حياتي، ويعتبر أكتر مسلسل اتحارب وباظ مننا في نصه بسبب كورونا.

وأضاف: لما جات كورونا كان ناقصنا 11 يوم تصوير، ويعتبروا أهم مشاهد في المسلسل كله، فاضطريت نقص نص المشاهد، وبعدين اتفاجئنا إن لوكيشن الفنان محمود البزاوي ومحمد دياب وياسمين صبري مش موجودين ومش هينفع يتأجروا عشان كورونا، واتقالي اتصرف وكان لازم أنقذ الموقف.

محمد سيد بشير يتحدث عن عقوبات فرصة تانية  

وأردف بشير: اضطريت أغير لوكيشن هبة مجدي ومحمد دياب 3 مرات، وكنا بنقول دراميًا "أصلنا رجعنا لبيتنا القديم"، ومحمود البزاوي في أحداث المسلسل عمره ما قعد على قهوة في الأيام اللي كانت ناقصة تصوير كل المشاهد كان الفنانين فيها بيروحوله على القهوة يقابلوه حتى ياسمين صبري.

محمد سيد بشير عن فيلم هروب اضطراري: اتنفذ بعد 12 سنة

ما عن  فيلم هروب اضطراري، فأشار محمد سيد بشير أن العمل تم تنفيذه بعد كتابته بما يقرب من 12 عام ورفض معظم منتجي مصر له، حتى وصل لمرحلة استسلام، موضحا: مكنتش أعرف إن فيلم "هروب اضطراري" هيتعمل بعد 12 سنة بكل نجوم مصر، ولكن إرادة ربنا غير، وده بعد ما لفيت بيه على كل منتجين مصر وعرّفني على كل الناس، وكنت بزعل واكتئب في كل مرة واتضايق.

وأضاف: آخر واحد كنت اتخيل إنه يعمل الفيلم ده محمد السبكي واستناني برا الشركة  يدور عليّا مستناش أدخله جوا، وقالي "أنت ازاي مجبتهوليش من الأول؟"، وقرأ النسخة الأصلية اللي كان فيها أكشن ضعف اللي اتعمل ومدته طويلة جدًا حوالي ساعتين، وأول خناقة بيني وبين محمد السبكي كانت على مدة الفيلم وبعد ما اتصالحنا علمني إزاي أوزن الفيلم.

محمد سيد بشير يكشف عن تحدياته داخل الفن 

وأردف بشير: النسخة الأصلية من "هروب اضطراري"  متصورتش ومكنش ينفع يتنفذ بسبب التفاصيل اللي فيه، وفاكر كويس إن حسين القلا لما قرأه رماه في وشي وقالي "ده فيلم أمريكي" ومصدقش إن أنا اللي كاتبه.

واختتم محمد سيد بشير حديثه عن تغير الأقدار بعد سعيه لسنوات طويلة، مضيفًا: في 2013، كنت خلاص هستسلم وقولت لنفسي أنا حاولت كتير من 2005 ومنفعتش المحاولات ولازم تركز زي باقي زمايلك وتترقى، لحد ما جات اللحظة اللي كتبلي فيها الناقد أحمد شوقي رسالة "حمادة.. عندك استعداد تشارك في ورشة كتابة مسلسل؟" ووافقت وشاركت وقتها في مسلسل "كلام على ورق"، وقتها كل مديريني في البنك كانوا فرحانين ليّا؛ لأنهم كانوا مؤمنين بيّا وبيدعموني ويمشوني بدري عشان اجتماعات المسلسل وأوقات ينزلوا مكاني الشغل.