صحيفة تواصل - في تصريح ناري أثار عاصفة داخل الوسط الرياضي المصري، كشف عبد الواحد السيد، مدير الكرة السابق بنادي الزمالك، تفاصيل صادمة حول أزمة مستحقات اللاعب أحمد سيد “زيزو”، مؤكدًا أن ما يُتداول عن امتلاكه حقوقًا مالية بقيمة 82 مليون جنيه “أمر غير صحيح على الإطلاق”.

وأوضح أن زيزو لا يحق له سوى نحو 9 ملايين فقط قبل الخصومات، محذرًا من أن صدور حكم بهذا الرقم الضخم سيكون “كارثة قانونية” قد تفتح الباب أمام لاعبين آخرين للمطالبة بمبالغ خيالية مشابهة.

وقال عبد الواحد السيد في تصريحات عبر برنامج “اللعيب” على قناة MBC مصر: “هل بالفعل زيزو كان له مستحقات تُقدر بـ82 مليون جنيهًا؟ ده كلام طبعًا غير صحيح، وأنا طبعًا بقول لزيزو نصيحة ليه هو، يعني الراجل ده سبع سنين في الزمالك وموجود، والناس كانت بتحبه، فإنك تنهي حياتك حتى كمان لو رحت للنادي الأهلي أو المنافس، ده قرارك وربنا وفّقك، لكن إنك تبقى عندك مشكلة مع الناس في القصة دي، أعتقد إنك بتزود الموضوع أكتر، ممكن تتنسي بعد شهرين تلاتة، خلاص الموضوع ينتهي، طالما أنت عمال تزود في المشكلة وإنك تعمل إن ليك حقوق أصلًا مش ليك”.

وتابع: “إنت ما يبقاش ليك مثلًا أربعة غير الخصومات، ممكن ما يبقاش ليك 4 مليون وتطلب 80 مليون! يعني الأربعة مليون كمان ممكن يتخصموا. أشرح لك العقد؟ العقد مكتوب فيه 23 مليون بالضرائب، الـ23 مليون بالضرائب، كان في فترة الضرائب بتبقى مثلًا 20 وبعد كده 22 وبعد كده 25 و28، عشان يثبت المبلغ الصافي بتاعه اللي هو 20 مليون، عمل له إيه؟ كتب له في البند الثامن: ليك موسم 2022-2023 عشرين مليون اللي هو الصافي”.

وأضاف: “الأساس بتاعه كام؟ 23، الصافي بالضبط 23 مليون و923 و76 جنيهًا. هو بيزود عشان الضرائب، عشان يصفي، هو عشان الضرائب لو زادت مثلًا 2.5% أو 3% ما يتحسبش على اللاعب، يبقى النادي هو اللي يتحملهم، فهو عمل له أصلًا الصافي كام؟ 20، لو حسبت النسبة هتلاقي الـ23 دول عملوا لك 20 مليون. اللي هو في الموسم الأولاني 20 مليون، وفي الموسم الثاني 20 مليون، وفي الموسم الثالث كذلك. غير إنه واخد 20 مليون أول موسم وتاني موسم أخد 20 مليون من بره العقد. ده العقد بتاعه اللي اتحاسب عليه، والحاجات اللي بره دي لأن في حاجات تانية كتير غير دي”.

وتابع: “دلوقتي هو ليه 20 مليون في كل سنة. هو زيزو الرقم اللي طلبه إنه عمل الصافي مع الضرائب وحطهم مع بعض، يعني عايز ياخد عقده مرتين من الزمالك. وخلي بالك، العقود دي مش زيزو بس، ده إنت لو اديت لزيزو الفلوس دي، عندك أربع أو خمس لاعيبة كان معمول لهم عقود بنفس القصة، وكانت معمولة في الفترة اللي قبل ما أجي فيها”.

وعن سبب مطالبة زيزو بمبلغ 82 مليون جنيه، أوضح عبد الواحد السيد: “دي شغلة محامي نادي الزمالك يثبت الكلام ده. أنا اللي شايفه إنه كان له حوالي 9 مليون، هيتشال منهم نسبة المشاركة، غير الخصومات اللي اتعملت عليه، يعني هو المفروض أصلًا ما لهوش حاجة. يعني لو حد اتحكم له، هيتحكم له بـ4 أو 3 مليون، ده لو حصل. إنما الرقم اللي بيتقال ده كلام مش منطقي، ولو حصل، يبقى فيه مشكلة في الشؤون القانونية في نادي الزمالك، لأن العقد واضح وعنده بدل العقد اتنين تلاتة”.

وتابع: “زيزو قال لي من سنة: كلّمني قال لي: أنا ليا كذا، قلت له: لا، الكلام اللي إنت بتقوله ده مش مظبوط. وقعد سنة كاملة ما بيطلبش بيها، ليه طلب بيها بعد ما مشي؟ أنا وضحتها له تمامًا، قلت له: الكلام اللي حاصل ده”.

وبسؤاله، هل ممكن تقول في اتحاد الكرة؟ أجاب عبد الواحد السيد: “نعم، أقوله في أي مكان أنا مسؤول عن كلامي، دي أمور واضحة”.

واستطرد:”المشكلة إن العقود دي أنا مش اللي كاتبها، لكن اللي كتبها قبل كده، لأن عندي أربع أو خمس عقود لاعيبة نفس القصة. ده شغل محامين عشان يكبروا المبلغ، عشان يبان قدام جمهور الزمالك إن ليه فلوس ومضحي، وده ما حصلش. زيزو الوحيد اللي كان بياخد عقده كامل متكامل”.

وأكمل: “هو لاعب أو اثنين الأستاذ ممدوح عباس كان متكفل بيهم، وده بالنسبالي كان مريحني، لأنك بتشيل عبء عن النادي. هو مش صح طبعًا، بس ده اللي كان بيحصل. يعني كان بياخد جزء من النادي وجزء من ممدوح عباس. لا، كان زيزو السنة اللي أنا موجود فيها واللي بعدها بياخد فلوس مباشرة من الأستاذ ممدوح، كان بيحولها له على طول”.

وبسؤاله، هل الأموال التي كانت تحول له من ممدوح عباس هتتحسب؟، أجاب عبد الواحد: “آه طبعًا، ما العقد ما بيكدبش، التحويل كذا وكذا. كانت الفلوس بتخش النادي وتطلع له”.

وأضاف: “العقد مش أنا اللي كاتبه، كان مكتوب قبل ما أجي، مع أكتر من لاعب، يعني كان في خمس أو ست عقود بنفس الشكل. القضية دي هتبقى مشكلة كبيرة، لأن لو اتحكم بالمبلغ ده، يبقى اللاعيبة اللي موجودة هيعملوا نفس القصة”.

واختتم عبد الواحد السيد حديثه قائلًا: “أنا أي حاجة تخص نادي الزمالك لازم الناس يكون عندها دفاع واضح ومستميت عن النادي. يا جماعة، ما ينفعش واحد ليه 9 مليون غير الخصومات يطلب 82 أو 83 مليون! ده كارثة. غير الإعلانات اللي كان بيعملها، النادي ما أخدش منه حاجة. دي كارثة، بقول لك كارثة، لأن لو الحكم طلع كده، يبقى عندك لاعيبة تانية هتعمل نفس المشاكل الكبيرة”.