انتشرت فى الفترة الأخيرة فيديوهات غريبة: طفل شكله بريء جداً، بس صوته بيطلع بكلام ونبرة أكبر من عمره بكتير. الثواني بتعدي والفيديو بيجيب ملايين المشاهدات. السر؟ الذكاء الإصطناعي.

التطبيقات الجديدة بقت تاخد صوت طفل وتركبه على نص مكتوب، فتطلع النتيجة كأن الطفل هو اللي بينطق كلام الكبار بنفس التعبير والحدة. والناس بتضحك وبتنبهر، لأن اللي بيحصل مش متوقع ولا مألوف.

نفسياً إحنا متعودين على صورة معينة للطفولة: براءة، كلام بسيط، عالم صغير. لما الصورة دي بتتكسر فجأة ونلاقي الصوت الطفولي بيقول جمل معقدة بنبرة جادة أو صورة أكبر من عمر الطفل، مخنا بيتلخبط. اللخبطة دي بتتحول لضحك. دي آلية اسمها "انتهاك التوقع الآمن"، وهي من أقوى محفزات الضحك.

كمان الفيديوهات دي بتلعب على وتر الحنين. احنا بنحب نسمع كلام الكبار، بس المرة دي من مصدر غير متوقع تماماً. فبيحصل مزج بين المفاجأة وبين الراحة النفسية.

بس فين النقطة اللي لازم نقف عندها؟

الصوت جزء أصيل من هوية الإنسان، لما نستخدم صوت طفل عشان ينطق كلام كبير عنه، بنفصل الطفل اللى بيشوف دة عن نفسه، كمان بيتحول التريند من مجرد مقطع مضحك وجديد إلى قنبلة موقوتة للطفل لما يبدأ يقلدها ويتعامل بيها أمام أهله فيبقى خطر فى نشأته وطفولته اللى المفروض تتميز بالبراءة والنقاء الطفلي وتتلغى الطفولة ويبقى الطفل بيتكلم كحد كبير بطريقة مش مناسبة لعمره ولا ذهنه ودة يلغى طفولته ويؤثر سلبيا عليه ويشيله الهم بدرى.

وللأسف المنصات بتكافئ المحتوى دة، فكل ما الكلام كان أكبر من سن الطفل، كل ما الانتشار زاد، وبكده بنوصل رسالة غير مباشرة للأطفال: عشان تتشاف لازم تتكلم زي الكبار.

ولكن انتبه

التريند مسلي ومش هنقدر نوقفه، بس وعينا هو اللي هيفرق، اضحكي واتبسطي، بس افتكري إن براءة الطفل مش مادة خام للضحك.

الذكاء الاصطناعي قدر يخلي الطفل يتكلم زي الكبير.. .ودي فرصتنا احنا نخلي الكبير يفتكر ويهتم ببقاء براءة الطفل.

اقرأ أيضاً
رئيس الوزراء يؤكد دعم الموهوبين والمبدعين خلال تفقده منتزه إدكو الدولي

القومي للطفولة والأمومة يتابع واقعة فيديو لطفلين بمدافن ويؤكد اتخاذ إجراءات لحمايتهما

بسبب الـ AI.. أساتذة جامعات يحذرون من تراجع مستويات فهم الطلاب