كل سنة في شهر أكتوبر بنسمع الأغاني الوطنية ونشوف أفلام الحرب ونقول لأولادنا «ده نصر أكتوبر».

بس سؤال سريع: هو إحنا حكينا لعيالنا الحكاية صح ولا إكتفينا بالأغاني الوطنية وخلاص؟

الطفل لما يسمع كلمة "حرب" طبيعي يخاف، يتخيل ضرب وقتال، دورنا احنا نحول الخوف ده لفخر وفهم.

حرب أكتوبر مكنتش مجرد جيش بيحارب، دي كانت درس في علم النفس قبل ما تكون درس في العسكرية.

طب نحكيها لولادنا إزاي؟

1. إحكي عن الخوف قبل الشجاعة

قبل 73 كنا زعلانين ومكسورين بعد 67، طبيعي زي ما ابنك بيكون زعلان لما يلاقى مادة صعبة ودرجاتها قليلة، المهم عملنا إيه بعد الزعل؟ قمنا ذاكرنا وخططنا 6 سنين كاملة. عرّفي ابنك إن الفشل مش النهاية.

2. إحكي عن الخطة مش الضرب وبس

الجيش معبرش كده وخلاص، قعد يفكر، خط بارليف كان ساتر ترابي فى حجم الجبل، قالوا مستحيل يقع، احنا وقعناه بخرطوم مَيّة! قولي لابنك: اللي بيفكر ممكن يكسب بتوفيق من ربنا مش اللي صوته عالي.

3. كلنا كنا جيش

اللي عبر القناة كان أب، واللي خبز العيش في الفرن كانت أم، واللي هتف مع عيلته كان طفل. النصر محدش عمله لوحده، فهمي إبنك إن دوره في البيت والمدرسة مهم زي دور الجندي بالظبط.

4. ارمي كلمة "احنا انهزمنا قبل كده"

متخبيش، قولي له آه اتهزمنا واتعلمنا، لما تحكي لإبنك إننا وقعنا وقمنا، انتي بتعلميه المرونة النفسية، مش بتزرعي فيه هزيمة.

5. العلم أهم من السلاح

المهندس اللي عمل الكوبري، والدكتور اللي أسعف الجرحى، والمدرس اللي كان بيعلم، من غير علم مفيش نصر، ذاكري مع إبنك وقولي له "انت بتحارب دلوقتي بقلمك".

إمتى أقلق؟

لو ابنك بيسمع كلمة حرب ويترعب، أو يشوف فيديو ويجيله كوابيس، أو يقول "أنا خايف الحرب ترجع" يبقى محتاجين نطمنه مش نخوّفه زيادة، نحكي عن الأمان اللي إحنا فيه دلوقتي بسبب اللي ضحوا.

الهدف مش بس نفتكر يوم 6 إكتوبر، الهدف نطلع طفل منتمي، عارف إن بلده غالية، وإن هو نفسه يقدر يبقى بطل في مكانه، بقلمه وكتابه وأخلاقه.

كل أكتوبر وإنتم أبطال صغيرين

دكتوراه علم نفس الطفل