تواصل نيوز - علّق الإعلامي أحمد شوبير على آخر تطورات أزمة الجناح الدولي أحمد سيد زيزو مع نادي الزمالك، بعد الجدل الكبير حول مستحقات اللاعب المالية وشكوى النادي ضده، معبرًا عن دهشته من طلب القلعة البيضاء مهلة جديدة لمدة شهر لتقديم المستندات الخاصة بالقضية.

وقال شوبير خلال تصريحاته عبر إذاعة “أون سبورت إف إم”: “كلنا بقينا عايشين في قصة زيزو والزمالك بقالنا فترة طويلة.. شكوى من هنا، ورد من هناك، وحكايات ما بتنتهيش، لكن لسه القضية معلّقة ومفيش حسم حتى الآن”.

وأضاف: “الزمالك راح اتحاد الكرة للرد على مستندات زيزو، والموضوع باختصار إن النادي بيقول إن له فلوس عند اللاعب، بينما زيزو بيأكد إن عنده مستحقات متأخرة تتجاوز 80 مليون جنيه، وفي المقابل الزمالك بيقول إن اللاعب مديون بـ20 مليون جنيه!”.

وتابع شوبير متسائلًا بنبرة حادة: “زيزو قدّم ورقه ومستنداته خلاص، والزمالك طلب شهر عشان يجهز أوراقه! طيب إزاي؟ أنت داخل قضية مصيرية ومتكلم قبل كده إنك جاهز تمامًا، فين المستندات اللي كنت بتتكلم عنها؟”.

وأشار: “الموضوع بصراحة غريب جدًا.. هل فعلاً النادي جاهز؟ ولا لسه بيجمع أوراقه؟ إحنا في أكتوبر، وبعدها نوفمبر وبطولة الأمم الإفريقية قربت، يعني لو كل مرة هنطلب شهر تأجيل، القضية مش هتخلص خالص!”.

وأضاف شوبير مؤكدًا على ضرورة الوضوح: “القصة دي بترجعني لقضية الكابتن طارق مصطفى.. لأن نفس السيناريو بيتكرر، تصريحات كتير ووعود إن كل حاجة جاهزة، لكن وقت الجدّ مفيش مستندات!”.

واختتم شوبير حديثه قائلًا: “يا جماعة، كفاية إشغال للرأي العام بحكايات مش محسومة.. لو الزمالك عنده مستندات يقدمها ويكسب قضيته، لو ماعندوش يقول بصراحة خلاص، بس بلاش نعيش الجمهور في دوامة كل شوية. لما أقول كده بيقولوا أنت ضد الزمالك، وأنا بالعكس، أنا بس عايز الحقيقة تظهر، لأن اللي بيحصل غريب جدًا!”.